main us ki baat ki tardid karne wala tha
ek aur hadsa mujh par guzarne wala tha

kahin se aa gaya ek abr darmiyan warna
mere badan mein ye suraj utarne wala tha

mujhe sambhaal liya teri ek aahat ne
sukut-e-shab ki tarah main bikharne wala tha

ajib lamha-e-kamzor se main guzra hun
tamam silsila pal mein bikharne wala tha

main ladkhada sa gaya saya-e-shajar mein zarur
main raste mein magar kab thaharne wala tha

ab aasman bhi bada shant hai zamin bhi sukhi
guzar gaya hai jo hum par guzarne wala tha

laga jo pith mein aa kar wo tir tha kis ka
main dushmanon ki safon mein na marne wala tha