main usulon se baghawat nahin karne wali
kabhi tauhin-e-mohabbat nahin karne wali

mujh ko nazrana-e-dil pesh na kije sahab
har kisi se main mohabbat nahin karne wali

jo sharafat ki hadon mein kabhi rahte hi nahin
aise logon ki main izzat nahin karne wali

tu ne dil tod diya kar diya mahrum-e-wafa
phir bhi main teri shikayat nahin karne wali

khun-e-mazlum se jo pyas bujhaen apni
main kabhi un ki himayat nahin karne wali

mere dil ne jise chaha wahi sab kuchh hai mera
main mohabbat ki tijarat nahin karne wali

ai 'ana' meri tabiat mein hai shokhi lekin
dil-shikan koi shararat nahin karne wali