main wo nahin ki zamane se be-amal jaun
mizaj puchh ke dar-o-rasan ka tal jaun

wo aur honge jo hain aaj qaid-e-be-samti
wahi hai samt mein jis samt ko nikal jaun

fareb kha ke junun aql ke khilaunon se
khuda wo waqt na lae ki main bahal jaun

mera wajud hai momi kahin na ho aisa
kisi ki yaad ki garmi se main pighal jaun

jo chahta hai ki pasti mein girte girte bachun
nazar ka apni asa de ki main sambhal jaun