main yun to ek chhota sa diya hun
magar rukh par hawa ke jal raha hun

meri jaanib tawajjoh kaun dega
hun aaina magar tuta hua hun

nawazish aisi ki hai doston ne
main apne sae se ab dar raha hun

tumhi karte ada rasmen wafa ki
to main taslim karta bewafa hun

zamin par aa gaya hun aasman se
ana ki rau mein jab bhi main baha hun

tera bartaw jo ho sab gawara
tujhe had se ziyaada chahta hun