main ne aaj ek tamasha dekha
saghar-e-chashm mein dariya dekha

raat ek khwab nirala dekha
dosh par apna janaza dekha

puchhiye kuchh nahin kya kya dekha
waqt ne jo bhi dikhaya dekha

khun patthar se bhi rista dekha
zindagi tera sarapa dekha

qaid thin dard ki sadiyan jis mein
meri qismat ne wo lamha dekha

tishnagi hi jaise dariya se mili
us ne qatre mein bhi dariya dekha

hadse waqt ke hain jis pe raqam
kya kisi ne bhi wo chehra dekha

umr-bhar dhup mein yunhi tadpo
tum ne kyon khwab sahar ka dekha

so gaya waqt bhi mahtab ke sath
raat 'shibli' ko bhi tanha dekha