main ne jab had se guzarne ka irada kar liya
manzil-e-dushwar ko tai pa-piyaada kar liya

be-haqiqat ho gae meri nazar mein mehr-o-mah
main ne jab ghar ke diye se istifada kar liya

aansuon ne gham ko uryan kar diya hota magar
dil ki ghairat ne tabassum ko labaada kar liya

amn ki sab shahrahen tang ho kar rah gain
hadson ne rasta kitna kushada kar liya

umr bhar 'azim' rahega nashsha-e-gham ka khumar
aankh ko paimana-e-khun dil ko baada kar liya