main ne kaha ki dil mein to arman hain bahut
us ne kaha ki aap to nadan hain bahut

main ne kaha ki mujh ko hai jannat ki aarzu
us ne kaha ki waqif-e-iman hain bahut

main ne kaha ki mahka hua ek gulab hun
us ne kaha zamin pe gulistan hain bahut

main ne kaha ki meri panahon mein aaiye
us ne kaha ki mere nigahban hain bahut

main ne kaha ki ek murassa ghazal hun main
us ne kaha ki aise to diwan hain bahut

main ne kaha ki tark-e-wafa se hun sharmsar
us ne kaha ki hum bhi pasheman hain bahut

main ne kaha ki rakkhega 'mohsin' adab ki laj
us ne kaha ki waise to imkan hain bahut