main ne khud ko jo hai kiya khamosh
dard bhi ho gaya mera khamosh

jab mere panw mein thakan na mili
ho gaya mera rasta khamosh

de rahi thi sada mohabbat ki
ho gai hai wahi saba khamosh

us ko sare jawab milte the
main sawalon pe jab raha khamosh

zor tufan ne sab laga dala
par hua na mera diya khamosh

bolna main bhi chahta tha magar
kuchh zabanon ne kar diya khamosh

maut ki kya use zarurat hai
ab to 'irfan' ho gaya khamosh