makr-o-ayyari ka daman chhod de
aql se ghairat ka rishta jod de

zarf hai to mod le kuchh panw aur
chhoti chadar ki shikayat chhod de

jag-hansai ho na jae phir kahin
be-sabab auron pe hansna chhod de

zulm ko bardasht karna jurm hai
zalimana feal ka dam tod de

dil ke donon harf hote hain juda
ho sake to tute dil ko jod de

zehn ko shaffaf dil ko pak rakh
aainon se tu ulajhna chhod de

manzil-e-maqsud pane ke liye
zindagi ko ek naya sa mod de