man mat kar aashiq-e-be-tab ka arman man
jaan kar anjaan mat ho muj kun tu be-jaan jaan

fikr apni nahin mujhe hai us ki bad-nami ka khauf
mujh kun nam-o-nang ki hai har ghadi har aan aan

tir o khanjar mein nahin hai aab-dari is qadar
tujh nigah ki dekh kar jaldi hua qurban ban

dasht-e-wahshat mein nipat be-kas hun ai aahu-nigah
hun bhikari wasl ka de muj kun is maidan dan

qatl karne par tere hai tegh-bar-kaf wo sanam
sar-kashi mat kar 'siraj' ab jaan ka farman man