manzil pe pahunch kar bhi manzil nahin pate ho
tum kaise musafir ho rukte ho na jate ho

aae na ayaadat ko jab sans thi kuchh baqi
marne pe aqidat ke kyon phul chadhate ho

pahle meri nafrat par mail-ba-karam the tum
ab meri mohabbat par barham nazar aate ho

mai-noshi ka phir mujh par ilzam na aa jae
aankhon mein liye masti kyon samne aate ho

'ambar' to azal se hi ruswa-e-zamana hai
kyon aur use apni nazron se giraate ho