subh-e-bahaar-e-gham ki kabhi sham dekhna
aaghaz dekhna kabhi anjam dekhna

hasti gham-e-jahan gham-e-jaanan mein kat gai
likkha tha kab nasib mein aaram dekhna

tera khulus teri mohabbat teri nazar
kar degi ek din hamein badnam dekhna

tauba ke baad raqs mein paimane aa gae
hasrat bhari nigah se phir jam dekhna

'ambar' kabhi kisi se na tum tut kar milo
ek roz tum pe aaega ilzam dekhna