manzilon ka main pata bhi dunga
khud ko raste se hata bhi dunga

itna ehsan-faramosh nahin
bewafai ka sila bhi dunga

apni hasrat to wo puri kar le
dushman-e-jaan ko dua bhi dunga

pahle darwaze pe dastak de lun
phir ye diwar gira bhi dunga

zindagi jurm to aaed kar de
be-gunahi ko saza bhi dunga

qatl bhi main hi karunga khud ko
aur phir khun-baha bhi dunga

aag bhadkegi 'tabassum' apni
yani shoalon ko hawa bhi dunga