mare dil bich naqsh-e-naznin hai
magar ye dil nahin yaro nagin hai

kamar par teri us ka dil hua mahw
tera aashiq bahut barik-bin hai

jo kahiye us ke haq mein kam hai be-shak
pari hai hur hai ruh-ul-amin hai

ghulam us ke hain sare ab sirijan
nagar mein husn ke kursi-nashin hai

nahin ab jag mein waisa aur pitam
sabi khush-suratan sun naznin hai

mujhe hai moshgafi mein mahaarat
jo nit dil mahw khatt-e-ambarin hai

nazar kar lutf ki ai shah-e-khuban
tera 'faez' ghulam-e-kam-tarin hai