maslahat ke zawiyon se kis qadar anjaan hai
aainon ke bich mein patthar bahut hairan hai

koi kyun banta sar-e-mahfil tamasha sahibo
sar utha kar bolna to bas meri pahchan hai

hamiyon ki bhid par is raaz ko ifsha karo
qafile ke muntashir hone ka bhi imkan hai

mera rona gidgidana raegan sab raegan
aap ka ek muskurana daimi farman hai

rekhta ka ek naya majzub hai 'shahpar' rasul
shohrat us ke nam par ek nang hai bohtan hai