masnad-e-gham pe jach raha hun main
apna sina khurach raha hun main

ai sagan-e-gurasna-e-ayyam
jun ghiza tum ko pach raha hun main

andarun-e-hisar-e-khamoshi
shor ki tarah mach raha hun main

waqt ka khun-e-raegan hun magar
khushk lamhon mein rach raha hun main

khun mein tar-ba-tar raha mera nam
har zamane ka sach raha hun main

haal ye hai ki apni haalat par
ghaur karne se bach raha hun main