mast josh-e-shabab hain hum log
aap apna itab hain hum log

mahfil-e-naz ho ki dar-o-rasan
har taraf kaamyab hain hum log

ek sarapa sawal hai duniya
ek mukammal jawab hain hum log

hain jahan mein kahin wafa wale
ji han aali-janab hain hum log

khalwat-e-khas ho ki jalwat-e-am
har jagah baryab hain hum log

hum se hai raunaq-e-zamin-o-zaman
waise khana-kharab hain hum log

hum fana hon to auj par aa kar
yani misl-e-habab hain hum log

sitam-e-be-panah hai duniya
karam-e-be-hisab hain hum log