ho chuki bagh mein bahaar afsos
aah ai bulbulo hazar afsos

qafila umr ka hai pa-ba-rikab
zist ka kya hai e'tibar afsos

meri raaton ko dekh sokhtagi
na kiya ek din bhi yar afsos

shab se parwane ki lagan mein shama
subh tak roi zar zar afsos

sakht be-tabi se kati kal raat
aaj bhi dil hai be-qarar afsos

khal-o-khat ko samajh ke dana-o-dam
murgh-e-dil ho gaya shikar afsos

aah dast-e-junun se ai naseh
hai gareban tar tar afsos

jaan honton pe aa gai hamdam
lekin ab tak phira na yar afsos

umr ghaflat mein kat gai hai 'nasir'
aah afsos sad-hazar afsos