maujib-e-rang-e-chaman khun-e-shahidan nikla
maut ki jeb se bhi zist ka saman nikla

thokaren khai hain utni ki ab apne dil se
shauq-e-awargi-e-dasht-o-bayaban nikla

hum bahut khush the ki jag utthi hai apni qismat
aane wala kisi hamsae ka mehman nikla

hai ajab baat ki jis raste pe hum chal nikle
ghum phir kar wo sar-e-kucha-e-jaanan nikla

be-hisi ne jo kabhi fursat-e-gham di hum ko
ek sailab-e-nahufta tah-e-mizhgan nikla

chaaragar khatra-e-jaan kahte the jis ko 'basir'
wahi gham bais-e-aram-e-rag-e-jaan nikla