mausam ki mar waqt ka koda hai meri samt
ab jo bhi jis tarah bhi hai achchha hai meri samt

sochun to sau malal mujhe sans sans par
dekhun to ek aag ka dariya hai meri samt

dariya ke pakchhpat pe ab kya kahen ki jo
uthla hai teri samt to gahra hai meri samt

aisi udas raat ki kate nahin kate
baam-o-ufuq pe chhaya andhera hai meri samt

main wo shajar hun jis ki sabhi pattiyon mein chhed
main wo kaman hun jis ka nishana hai meri samt

aankhon ka dasht khwab ki lapton se jal gaya
aur is ke bawajud jo sabza hai meri samt

ek raushni jo fikr mein utri hai ghaib se
ek bagh lafz khulte hi mahka hai meri samt