maut ka kuchh khiraj tha bhi nahin
us se achchha ilaj tha bhi nahin

dil pe hi roke zindagi ke war
aur kuchh mujh pe aaj tha bhi nahin

sun ke har baat an-suni karna
ye tumhaara mizaj tha bhi nahin

us ne pal bhar mein mujh ko chhod diya
ishq mein ye riwaj tha bhi nahin

ishq ne hi kiya use takhliq
warna pahle samaj tha bhi nahin

chaarasazon ne zahr hi likkha
aur koi ilaj tha bhi nahin

ishq mein kal siwae rone ke
dusra kaam-kaj tha bhi nahin