maut se dard-e-mohabbat ki dawa mangi hai
main ne khud apni khataon ki saza mangi hai

tod mat bahr-e-khuda aas dil-e-pur-gham ki
main ne zalim tere milne ki dua mangi hai

rahmaten us ki tabahi-e-wafa par jis ne
marte-marte tere daman ki hawa mangi hai

main ne kuchh aur nahin chaha khuda-e-gham se
bas tere husn ki har ek bala mangi hai

apne sar aap na len dil-shikani ka ilzam
main ne khud apni tabahi ki dua mangi hai

hae kya chiz hai 'sahir' ye mera husn-e-talab
main ne har chiz zamane se juda mangi hai