mayus andheron se na a dida-e-tar ho
aakhir to kabhi is shab-e-gham ki bhi sahar ho

ab shauq ka izhaar ba-andaz-e-digar ho
dil tut bhi jae to kisi ko na khabar ho

shayad ki kabhi us ko bhi ho jae mohabbat
shayad ki kabhi us ki bhi aankhon mein basar ho

ho dil mein bapa hashr to ho lab pe khamoshi
yun kijiye ulfat ki unhen bhi na khabar ho

wada to hua hai ki wo aaenge sar-e-sham
ab dekhiye kis rang mein is shab ki sahar ho

kab tak main rahun mahw-e-sukut-e-shab-e-hijran
ai qalb-e-hazin nala bapa kar ki sahar ho

ek umr kati khana-badoshi mein hamari
hasrat hai ki duniya mein koi apna bhi ghar ho

tum waris-e-jamshed-o-sikandar sahi lekin
ai kash tumhein apne watan ki bhi khabar ho

sejon pe kate umr ki kanton pe 'tabassum'
bas ek tamanna hai mohabbat mein basar ho