maza jab hai use barq-e-tajalla dekhne wale
jamal-e-yar mein tahlil ho ja dekhne wale

nazar aati tujhe har khak ke zarre mein ek duniya
nigah-e-ghaur se tu ne na dekha dekhne wale

tujhe nazdik se bhi ek din wo dekh hi lenge
tasawwur mein tera husn-e-dil-ara dekhne wale

khabar bhi hai tujhe kuchh ye tamasha-gah-e-alam hai
tamasha khud na ban jaana tamasha dekhne wale

harim-e-tur ka 'simab' jab uthne laga parda
nida ye ghaib se aai sambhal ja dekhne wale