mazdur ke kisan ke haalat pe likhen
aao ghazal ko apni nai baat pe likhen

ab dastan-e-shirin-o-farhad chhod kar
ashfaq ke bhagat ke khayalat pe likhen

apni qalam ko rang-e-siyasat se mod kar
kashmir pe asam pe gujraat pe likhen

insaniyat ke zikr ka kuchh bhi hai gar khayal
is mulk ke gharib ke jazbaat pe likhen

insan hi to pyasa hai insan ke khun ka
qatil ke dar se sahmi hui raat pe likhen