mera sina hai mashriq aaftab-e-dagh-e-hijran ka
tulu-e-subh-e-mahshar chaak hai mere gareban ka

azal se dushmani taus o mar aapas mein rakhte hain
dil-e-pur-dagh ko kyunkar hai ishq us zulf-e-pechan ka

kisi khurshid-ru ko jazb-e-dil ne aaj khincha hai
ki nur-e-subh-e-sadiq hai ghubar apne bayaban ka

chamakna barq ka lazim pada hai abr-e-baran mein
tasawwur chahiye rone mein us ke ru-e-khandan ka

diya mere janaze ko jo kandha us pari-ru ne
guman hai takhta-e-tabut par takht-e-sulaiman ka

kisi se dil na is wahshat-sara mein main ne atkaya
na uljha khar se daman kabhi mere bayaban ka

tah-e-shamshir-e-qatil kis qadar bashshash tha 'nasikh'
ki aalam har dahan-e-zakhm par hai ru-e-khandan ka