mera wajud shumar-e-nafas mein aaya nahin
tamam-umr main sanson ke bas mein aaya nahin

nuqush-e-lams-e-haqiqat mitane wala tha
magar wo khwab meri dastaras mein aaya nahin

sawal ye hai ki dasht-e-badan ka kya hoga
agar junun ka parinda qafas mein aaya nahin

ajab nahin ki ye bahen kuchal ke rakh detin
bhala hua wo hisar-e-hawas mein aaya nahin

ye kaun hai jo hamein tul deta rahta hai
ye kaun hai jo zad-e-pesh-o-pas mein aaya nahin