mere hazar ghamon ka hisab kaun likhe
main ek kahani hun mujh par kitab kaun likhe

gunah likhte rahe meri aah ko lekin
jo ashk dil mein hain un ko sawab kaun likhe

tumhaari yaad nahin ek azab hai goya
magar tumhaare karam ko azab kaun likhe

hum apne zakhm-e-jigar ko chhupae baithe hain
tumhaare chehre ko taza gulab kaun likhe

mera qalam to mera sath chhod baitha hai
kitab-e-dil ka meri intisab kaun likhe

sabhi ko pyari hai jaan apni ek mere siwa
sitam sitam ko tumhaare janab kaun likhe

main apne khat bhi khud un ki taraf se likhti hun
wafa ko chhodiye us ka jawab kaun likhe