mere khuda na mujhe zauq-e-khud-numai de
jo dena hai mujhe taufiq-e-parsai de

mile jo beta to akbar sa jaan-nisar mile
jo bhai de mujhe abbas jaisa bhai de

bhatak raha hun main ek barg-e-khushk ki manind
khuda kisi ko na mujh jaisi be-nawai de

meri nigah mein jalwe tere simat aaen
jahan main jaun wahin tu hi tu dikhai de

teri raza ki hai khwahish qadam qadam pe mujhe
jo chahte hain khudai unhen khudai de