mere qadmon se ek rahguzar bandh kar
chhin li us ne manzil safar bandh kar

kya zamin dekhna kya falak dekhna
us ne chhoda mujhe mere par bandh kar

umr-e-rafta ki yaaden sanbhaale hue
ghar se nikli hun nazron mein ghar bandh kar

meri nazron mein jachta na tha ye jahan
us ne jadu kiya tha nazar bandh kar

ek riwayat nai dalni hai mujhe
misra-e-tar mein bhi chashm-e-tar bandh kar

mere rab ne mujhe mo'atabar kar diya
mere nok-e-qalam se hunar bandh kar