mere sar se kya gharaz sarkar ko
dekhiye apne dar-o-diwar ko

ye ghata aisi ghata itni ghata
mai halal aise mein hai mai-khwar ko

dhamkiyan dete ho kya talwar ki
hum lagate hain gale talwar ko

apni apni sab dikhate hain bahaar
gul bhi gulshan se chale bazar ko

taq se mina utar aai bahaar
taq par rakh shaikh istighfar ko

dhundhta phirta hai ku-e-ghair mein
dil 'mubarak' ko 'mubarak' yar ko