meri aahon mein asar ho ye zaruri to nahin
dard ki sab ko khabar ho ye zaruri to nahin

ishq taslim magar taj-mahal ke jaisa
har kisi shakhs ka ghar ho ye zaruri to nahin

sab ki nazron ke muqabil nahin jalwe tere
sab ko mearaj-e-nazar ho ye zaruri to nahin

har kisi ka to muqaddar nahin hote aansu
aankh har ek ki tar ho ye zaruri to nahin

kuchh nahin hai meri nazron mein ye duniya 'mohsin'
is ka ehsan mere sar ho ye zaruri to nahin