meri ana ka asasa zarur khak hua
magar khushi hai ki tere huzur khak hua

mujhe badan ke bikharne ka gham nahin lekin
malal ye hai dil-e-na-subur khak hua

main apni khak se raushan hua jo surat-e-mushk
tamam mausam-e-gul ka ghurur khak hua

bichhad ke tujh se ye kam to nahin ziyan mera
har ek manzar-e-nazdik-o-dur khak hua

ye kaisa qaht mere zehn-o-dil pe aaya hai
'salim' meri ghazal ka shuur khak hua