meri koshish ka samar hai mukhtalif
pyar ka us par asar hai mukhtalif

sari duniya mein nahin us ki misal
sab se wo rashk-e-qamar hai mukhtalif

dil mera taskin pata hai yahan
mere ghar se tera ghar hai mukhtalif

us ko bhati hain khataen bhi meri
man ka andaz-e-nazar hai mukhtalif

mujh se aksar muttafiq hota to hai
kya hua mujh se agar hai mukhtalif

ho gai dushwar rah-e-zindagi
mujh se mera ham-safar hai mukhtalif

mutmain hai ranj-o-gham mein bhi zaman
dar-haqiqat wo bashar hai mukhtalif