meri nazron mein duniya thi magar andar thi tanhai
sar-e-manzar tha hangama pas-e-manzar thi tanhai

padhi thi mai-kadon ke shor ki har dastan hum ne
magar us shor mein paiwast fitna-gar thi tanhai

hawaen khush-gumani ki bulane aain thin lekin
udasi panw jakde thi shikasta-par thi tanhai

saji thi khana-e-dil ki har-ik diwar yaadon se
bahut pur-soz se lahje mein naghma-gar thi tanhai

khizan-alud shakhon par parinde bhi nahin aae
isi be-saebani mein barahna sar thi tanhai

mere atraf sab chehron pe khushiyan thin ta'alluq tha
magar aankhon ki tah mein waswason se tar thi tanhai

junun tha wahshaten thin aabla-pai thi hasrat thi
'hina' dasht-e-mohabbat mein bahut muztar thi tanhai