meri nigah ko ai kash ye hunar aae
main aankh band karun aur wo nazar aae

hamein na pyas ki shiddat na kuchh thakan ka gila
ai zindagi tere sahra se hum guzar aae

tumhaari talkh-kalami se ji udas hua
jo bhar chuke the mere zakhm phir ubhar aae

sahn mein baith ke hum phir hansi mazaq karen
khuda kare kabhi mausam wo laut kar aae

bhigo rahi thi kabhi jis ki yaad ki barish
wo dhup ban ke mere sahn mein utar aae