meri pahchan hai kya mera pata de mujh ko
koi aaina agar hai to dikha de mujh ko

tujh se milta hun to aksar ye khayal aata hai
is bulandi se agar koi gira de mujh ko

kab se patthar ki chattanon mein hun gumnam o asir
dewtaon ki tarah koi jaga de mujh ko

ek aaina sar-e-rah liye baitha hun
jurm aisa hai ki har shakhs saza de mujh ko

in andheron mein akela hi jalunga kab tak
koi shai tu bhi to khurshid-numa de mujh ko