meri zaban ki ibarat hai guftugu teri
mere fasane ka unwan hai aarzu teri

abas ki mujh pe hai ilzam-e-khud-faramoshi
haram se der mein lai hai justuju teri

fareb-e-nikhat-e-gul se bacha ke daman-e-dil
zaban-e-khar se sunta hun guftugu teri

hijab mein bhi tujhe be-hijab dekh liya
har ek phul mein chehra tera hai bu teri

zamana talib-e-didar hota jalwa-e-naz
bachi hai tur ke jalne se aabru teri

raha na parda salamat jamal-e-parda-nashin
gulon ne khinch li taswir hu-ba-hu teri

gharaz hai dair se mujh ko na fikr kabe se
main apne aap mein karta hun justuju teri

jo dekha ramz ki aankhon mein baad marne ke
khinchi thi putli mein taswir hu-ba-hu teri