mil baithne ke sare qarinon ki khair ho
is karwan-sara ke makinon ki khair ho

thahraw paniyon mein hai kitna ajib sa
dariya ke khush-khiram safinon ki khair ho

har khwab ke safar mein mere panw ke tale
aa kar khisakne wali zaminon ki khair ho

kar ek lamha sukh ka mere roz-o-shab ko dan
tere tamam sal mahinon ki khair ho

dam se unhi ke apne dar-o-baam hain buland
mere watan ke khak-nashinon ki khair ho