mili kya khak rahat kunj-e-marqad mein nihan ho kar
zamin-e-gor sar par phir rahi hai aasman ho kar

chhuri gardan pe qatil pherta hai shadman ho kar
nikalta hai mera dam aarzu-e-dushmanan ho kar

hamare qatl karne ka na tha us shokh ka mansha
ubhaara tegh aur khanjar ne kaisa ham-zaban ho kar

uda le chal hawa-e-shauq aage sab se manzil par
raha jata hun pichhe main to gard-e-karwan ho kar

faqir-e-mast wo hun main agar kuchh mauj aa jae
abhi mai-khana se kashti-e-mai aae rawan ho kar

ayan aasar hain ye aamad-e-fasl-e-bahaari ke
gareban aa raha daman mein mere dhajjiyan ho kar