misal-e-sang pada kab tak intizar karun
pighalne mein jo rawani hai ikhtiyar karun

khabar nahin wahan tu kaun se libas mein ho
main kaise aalam-e-pinhan ko aashkar karun

ba-rang-e-mauja-e-khushbu uda uda phire tu
main apne qurb se kyun tujh ko zer-e-bar karun

main dekhta hun use kaise kaise rangon mein
kashid-e-rang karun aur bar bar karun

wo ek bar bhi mujh se nazar milae agar
to main use bhi koi mehrban shumar karun

jo tu gaya hai to main bhi chala gaya goya
aur ab bhi dasht-e-tahayyur mein khud ko khar karun

yunhi to main 'zafar' is haal ko nahin pahuncha
fareb de jo mujhe us pe e'tibar karun