misal-e-tar-e-nazar kya nazar nahin aata
kabhi khayal mein mu-e-kamar nahin aata

hamare aib ne be-aib kar diya hum ko
yahi hunar hai ki koi hunar nahin aata

muhaal hai ki mere ghar wo raat ko aae
ki shab ko mehr-e-darakhshan nazar nahin aata

tamam khalq mein rahti hai dhup raaton ko
wo mehr baam se jab tak utar nahin aata

muhaal hai ki jahannam mein khuld se jaen
jo dar par aap ke jata hai ghar nahin aata

hamari zist mein the sath kaun kaun ai 'barq'
ab ek fatiha ko qabr par nahin aata