mismar hun ki khud ko uthane laga tha main
mitti se aasman banane laga tha main

be-ikhtiyar aankhon se aansu nikal pade
taswir se ghubar hatane laga tha main

aawaz de ke rok liya us ne jis ghadi
mayus ho ke laut ke jaane laga tha main

bhatka zara jo dhyan mere hath jal gae
bosida kaghzat jalane laga tha main

afsos khwab-e-marg ne mohlat na di 'shahab'
soya hua nasib jagane laga tha main