mita ke sare yaqin ke nishan rakh dega
badal ke wo yun tumhaara jahan rakh dega

tum apni baat nahin kah sakoge duniya se
tumhaare munh mein wo apni zaban rakh dega

wo noch lega tumhaare tamam baal-o-par
udan ke liye phir aasman rakh dega

manar-o-gumbad-o-mehrab tod dega wo
badal ke naqsha-e-hindostan rakh dega

gulon ke husn ko ruswa karega har-su wo
mila ke khak mein gulshan ki shan rakh dega

sitamgaron ko nawazega apni rahmat se
phir un ka nam bhi wo mehrban rakh dega

wo mere josh-e-safar par karega shak 'meraj'
qadam-qadam pe mere imtihan rakh dega