mohabbat aur kisi anjaan se uf
ulajhna aur dil-e-nadan se uf

achanak phone kya aaya kisi ka
lagi hain dhadkanen sab kan se uf

wo jis shiddat se mujh ko chahta hai
chali jaun na apni jaan se uf

main us ki khwahishon ko kaise talun
wo dekhe hai bade arman se uf

main us ki jaan hun jaun to kaise
wo jita hai mujhe ji jaan se uf

mohabbat jab se hai ruhon mein utri
mahakte hain badan loban se uf

'kiran' is ishq mein insan to insan
farishte bhi gae iman se uf