mohabbat ibtida mein kuchh nahin malum hoti hai
magar phir dushman-e-iman-o-din malum hoti hai

wajud-e-zat aks-e-alam-e-hasti se hai sabit
teri surat hi surat-afrin malum hoti hai

main milna chahta hun tujh se aise tur par ja kar
jahan teri tajalli bhi nahin malum hoti hai

gae hum dair se kabe magar ye kah ke phir aae
ki teri shakl kuchh achchhi wahin malum hoti hai

teri barq-e-tajalli ke chalan hum se koi puchhe
chamakti hai kahin lekin kahin malum hoti hai

tera eajaz-e-qudrat hai ki hasti ki numaish mein
zamane-bhar ko shakl apni hasin malum hoti hai

dil-e-'muztar' khuda ke waste is se kinara kar
mohabbat dushman-e-jaan-e-hazin malum hoti hai