mohabbat ka ise aazar bhi hai
mohabbat se ye dil bezar bhi hai

khatakti hai zamane ki nazar mein
mohabbat phul to hai khar bhi hai

barahman se na kar ai shaikh nafrat
teri tasbih mein zunnar bhi hai

murakkab hai ye insan khair-o-shar se
bashar mein nur bhi hai nar bhi hai

wo diwane ko diwana na samjhen
jo diwana hai wo hushiyar bhi hai

dil-e-insan mein zulmat bhi hai mana
magar ye markaz-e-anwar bhi hai

sune hain hum ne bhi ashaar-e-'zakir'
fasahat bhi hai aur mear bhi hai