mohabbat ke safar mein be-rukhi se chot lagti hai jise hum pyar karte hain usi se chot lagti hai zarurat se ziyaada guftugu achchhi nahin lagti zarurat se ziyaada khamushi se chot lagti hai mujhe be-khwab raaton se koi shikwa nahin phir bhi andhera dasta hai aur chandni se chot lagti hai shikasta aur suni khidkiyan aawaze kasti hain guzarta hun main jab is ki gali se chot lagti hai tumhaare sath bhi aisa ho to hairan mat hona kisi se milti hai rahat kisi se chot lagti hai yahan sab apni fitrat ke sabab pahchane jate hain shikari zehniyat ko sadgi se chot lagti hai kabhi hairan rah jata hun zalim ki jasarat par kabhi 'masum' apni buzdili se chot lagti hai