mohabbat zindagi hai zindagi ka nam masti hai
agar masti na ho to zindagi mitti se sasti hai

ugao dur tak ai doston faslen mohabbat ki
mohabbat jis jagah hoti nahin lanat barasti hai

wo rah-e-zindagi mein muskurana bhul jata hai
gharibi jis ko apni zulf ke panje mein kasti hai

kabhi wo josh tha apne kinare kat deti thi
magar ab to nadi khud qatre qatre ko tarasti hai

lutere aur qatil har jagah hain shahr mein 'anjum'
nahin malum hasil un ko kis ki sarparasti hai