mohabbaton ka yahi masala nahin jata
hum us se kaise kahen kya kaha nahin jata

wo dard hai to mere dil se kyun nahin uthta
ye dard wo hai jo mujh se saha nahin jata

ye kis jahan ka naqsha diya gaya hai mujhe
ki us ki samt koi rasta nahin jata

zara si main ne use khud mein kya jagah de di
ab apne aap mein us se raha nahin jata

miyan kabhi na kabhi dil-baran ke kuche mein
mujhe batao zara kaun sa nahin jata

ye zindagi bhi to phir zindagi nahin rahti
bichhad ke us se agarche mara nahin jata